تقرير حصري عن ((اجتماع آباء)) بقلم الكاتب فواز الشمري

السلام عليكم في يوم الثلاثاء وبعد آذان المغرب فطرت ولله الحمد ثم جلست جلسة عائلية احسد عليها المهم على سبع ونص اسمع الجوال يرن ولا هذا استاذ طلال يدق علي ويكولي جاهز عاد انا كنت جاهز واطلع من البيت واركب السيارة ومرينا باقي الشباب ((فيصل _عزوز))
صلينا وطوالي على المكتبة نجهز الأغراض عشان حفل الآ باء واحنا نجهز وستاذ طلال كان يقول ركب هذي وعدل ذيك ولا ألاحظ ان المكان منور استغربت !! الا بالنهاية طلع ابو مساعد الجغيمان جاي ونور المكان فيه الله الله كنا نشتغل وعلمااخلص الشغلة قلت يا حمد قم ياذيب وقهوي عمي بو مساعد قال ابشر (مشاء الله على حمد )وقام بالواجب بدون قصور كفا ووفي دقيقة الا وطلع نور مثل نور ابو مساعد انا استغربت للمرة الثانية!! المهم واطالع وراي الا ابو عمار العبدالقادر داخل علينا فرحبت به وقهويته وشوي ودخل علينا استاذ احمد طبعا كان متواجد بوفوزي وبوبدر وا_طلال وسلم وتقهوا وسولف مع الضيوف وماقصر وشوي ودخل علينا ابو خالد خداش وقهوينا وماقصرنا معاه ثم توالو الآباء الكرام واشعلو المكتبة من النور بنورهم والله لو تشوف المكان وشو بيصير فيك من قوة النور المهم بدا اللقاء بالتعريف عن بعض كل مشرف يعرف عن نفسه بدا ستاذ احمد بعدبوخالد بعدين مالقينا المشرفين وين راحو ... مدري والله المهم بدو فالآباء ومن حسن الحظ ان اول ظيف كان جالس هو ((الوالد )) وعرف بنفسه بعد كان بوخالد خداش بعدين بو محمد ومعاذ الغامدي بعدين بوعمار بعده بو فيصل بعدين بو محمد النهابة وكان العدد الله لايوريك غير المتوقع بالف مره !!
الزبدة بدا المنتاج وبعده قام بوخالد وسال قال مين وده يقول شي اي شي ملاحظات اقتراحات اسئلة فبدا بو خداش والله هو اكثر ماودي اقول الآباء أحس بكبرهم فبقول الشباب مشاركة فقال انا شفت (الخ.. واعطاني اكثر من اقتراح وشاركو الشباب والي أثار الآباء ابو محمد النهابة قال انا شفت بالمنتاج دلتين قهوة لنا بس مدري وين راحوا هههههههههه
وتسمع الظحك والله كانت جلسه ماتتقوت

شكرا على حسن قرااتكم سائلين المولى تعالى ان يبارك لكم في آبأكم كان معكم في هذا التقرير اخوكم فواز
وقبل ماانسى طرح بو محمد فكرة حلوة حلوة انهم يتبرعوا وبو عبد العزيز الباحسين وعدنا بالشيك وانشاء الله انه عند وعده

والسلام عليكم ورحمة الله وبركاته

يا جماعة تراني تعبت على الموضوع فارجوا التفاعل

السلام عليكم...
يعطيك الف ألف عااااافية أخووي الغلي الكاتب / فواز ....

صرااحة كلام جميل وأسلوب راااقي وإعداد مثير للقرأة ..

صراحة اللقاء كان جدا ممتاز بوجود أولياء الأمور الطيبين ...

والبساطة وفتح قلوبهم لنا وهذا مما يدل على حبهم لأبناءهم وللخير ...

ولا أنسى أحبابي حمد البيبي وفواز البغيل وفيصل الدخيل وعبدالعزيز أباحسن الذين ساااهموا في إنجاح اللقاء من التوثيق والضيافة والترتيب ..

وقبل كل هذا لابد أن أشكر أخواني المشرفين على هذا اللعداد والترتيب والحمااس الذي ينصب للخير ..

أختم بقولي :: نتمنى من الله أن يوفقنا وأن ييسر أمورنا والله أعلم ..

جزاك الله خير فواز .. كان ابوي بيجي .. بس ما قدر

الله يعطيك العافية

مشكور يا فواز على التغطية الجميلة

والصراحة وأنا أقرا كنت مستااانس جدا جدا جدا

مشكووور وما تقصر

ماشاء الله عليك ...
لديك استحضار ممتاز لجميع الأسماء ومن بداية الحفل
( من طق طق لسلام عليكم )

وأسلوبك البليغ في نور الأباء ...خطير

الله يجزاك خير وماقصرت

الله يعطيكم العافية ماقصرتوا بس وين الباقين

البرنامج كان روووعه وخاصة ان ثوبي كان ضيق + الكنب مشقوق (( تعشوا عليه الفيران )) أتوقع أول الحظور كان أبو معاذ ومحمد الغامدي

وفعلنا كان فيه أقترحات جميله منهم وماقصرو الحظور من الآباء و الطلاب

لاكن أحسن شي كان نقطة بو فيصل الدخيل وكان بكل شجاعة وأمام أبنه قال : (( بالمعنى ))

بعض عيال المكتبه أو المكتبات الأخرى (( قصده فيصل )) في المكتبه مؤدب و البيت العكس يتعبنا فنبي أوراق نكتب فيها أيش مزعجنا الولد

فأنصح أخونا فيصل بوالديه و أخوانه (:

أما أبو خداش وطارق فأبشركم رفع راسكم (: مشاء الله عليه بس يمدح فيكم

وأكتشفنا ان أكثر الآباء في أرامكو (::

وآسفين على الإطاله لاكن الأخبار أول بأول

هههههههههههههههههههههه
حشرنا فيصل

يعطيك العافية فواز وصراحة ماقصرت على الموضوع ولا تخاف تعبك إنشاء الله في موازين حسناتك

وصراحة أنا كنت متحمس وأنا أقرأ الموضوع

ويغطيك العافية على التغطية الممتازة

مشكووور على الرد الي اثلج صدري

الله يعطيك العافية اخوي فواز على التقرير المميز,بس ,,,من دق باب الناس دقوا بابه,,,(بالعربي الضحك تكتب هكذا,ههههه,وماذا تعني هذا الجملة(والله كانت الجلسة ما تتقوت)( اشرح وغيرها كثيرررررررررررررر.

انت ياستاذ لاتدقق لغويا اهم شي المعنى وصل

الخطا اللغوي جريمة كبرى عندي أما الخطأ المطبعي اللي وقعت فيه انا فهو ضغطة زر,,
على العموم ماشرحت( كانت الجلسة ماتتقوت) ,هل المعنى :ماتتوقع, او ماتتفوت.
ولك مني خالص الشكر والتقدير(محبك في الله أبوبندر)

كانت الجلسة ماتتفوت

مشكور فواز عالتقرير المفصل الزبدة كان اللقاء جميل
كان يوم رائع وتوصخ ثوبي بالأخير ههههههههههههههههههههههه
وثانيا ايش هالأسلوب الرائع

ممكن ا.طلال تنزل المقطع على الموقع

نرجو من الأستاذ أحمد تنزيل المونتاج الصيفي<تحس نداء طيارة>

ممكن ا.طلال تنزل المقطع على الموقع

مقطع ايش